ໂລກ້າ ຮ່ວມມື ບໍລິສັດ ໂຊກມີໄຊ ຂະຫຍາຍບໍລິການແທັກຊີອອນລາຍ 24ຊົ່ວໂມງ ຢູ່ທີ່ ປາກເຊ ແຂວງຈຳປາສັກ

Share:

ບໍລິສັດ ໂລກ້າ ຈຳກັດ ຜູ້ໃຫ້ບໍລິການແທັກຊີອອນລາຍ 24 ຊົ່ວໂມງ ໄດ້ເປີດໃຫ້ບໍລິການແລ້ວ ທີ່ ປາກເຊ, ເຊິ່ງກ່ອນຈະມີການເປີດໂຕທີ່ ນະຄອນປາກເຊ ໂລກ້າ ໄດ້ເປີດໃຫ້ບໍລິການແລ້ວທີ່ນະຄອນຫຼວງວຽງຈັນ ແລະ ນະຄອນຫຼວງພຣະບາງ.  ແຕ່ໄວໆນີ້ ບໍລິສັດ ໂລກ້າ ຈໍາກັດ ໄດ້ຮ່ວມກັບ ບໍລິສັດ ໂຊກມີໄຊ ຈຳກັດ ຜູ້ດຽວ ເພື່ອໃຫ້ບໍລິການແທັກຊີອອນລາຍ. ທັງນີ້ກໍເພື່ອເພີ່ມທາງເລືອກຮູບແບບບໍລິການໃໝ່ໆໃຫ້ກັບລູກຄ້າ ແລະ ກະແສທີ່ຮຽກຮ້ອງຈາກລູກຄ້າທີ່ຢູ່ຕ່າງແຂວງ ໂດຍສະເພາະແມ່ນແຂວງຈຳປາສັກ.

ການເຊັນສັນຍາ ຂອງການເປີດໂຕບໍລິການໂລກ້າ ໄດ້ຈັດຂຶ້ນໃນເວລາ 14:00ໂມງ ຂອງ ວັນທີ 29 ມິຖຸນາ 2021 ທີ່ ຫ້ອງການສະພາການຄ້າ ແລະ ອຸດສາຫະກໍາ ແຂວງຈຳປາສັກ. ເຊິ່ງໄດ້ຮັບກຽດຈາກບັນດາທ່ານທີ່ໄດ້ຮ່ວມເປັນສັກຂີພະຍານຄື: ທ່ານສຸລິຍາ ນາເຟືອງວິໄລ ຮອງຫົວໜ້າພະແນກແຜນການ ແລະ ການລົງທຶນແຂວງຈໍາປາສັກ, ທ່ານ ລັດສະໄໝ ຮຸ່ງໄຊຍະສິງ ຮອງປະທານ ສູນບໍລິການວິສາຫະກິດຂະໜາດນ້ອຍ ແລະ ກາງແຂວງ ຈໍາປາສັກ, ທ່ານ ສິໂຫ ຈັນທະຄູນ ຮອງຫົວໜ້າຂະແໜງການຄຸ້ມຄອງຂົນສົ່ງ ພະແນກໂຍທາທິການ ແລະ ການຂົນສົ່ງ ແຂວງຈໍາປາສັກ.

ໂດຍການຮ່ວມເຊັນສັນຍາ ດັ່ງກ່າວ, ທ່ານ ສຸລິໂຍ ວົງດາລາ ຜູ້ອຳນວຍການ ບໍລິສັດ ໂລກ້າ ຈຳກັດ ໄດ້ກ່າວເຖິງຄວາມເປັນມາຂອງໂລກ້າ, ບໍລິການຕ່າງໆຂອງໂລກ້າ ແລະ ນຳສະເໜີເຖິງແຮງບັນດານໃຈໃນການຮ່ວມມືກັນລະຫວ່າງ ໂລກ້າ (LOCA) ພ້ອມທັງເນັ້ນວ່າ: ບໍລິສັດ ໂລກ້າ ຈຳກັດ ຂອງເຮົາໄດ້ເບິ່ງເຫັນເຖີງຄວາມຕ້ອງການຂອງລູກຄ້າທາງແຂວງຈຳປາສັກ ທີ່ຮຽກຮ້ອງຢາກເຫັນການບໍລິການແບບໃໝ່ທີ່ໜ້າສົນໃຈ ແລະ ກໍຖືວ່າເປັນກະແສຕອບຮັບທີ່ດີ. ເຮັດໃຫ້ເຮົາໄດ້ມີແນວທາງໃໝ່ໃນການຂະຫຍາຍການບໍລິການໃຫ້ແກ່ລູກຄ້າ ແລະ ໄດ້ມີ ບໍລິສັດ ໂຊກມີໄຊ ຈຳກັດຜູ້ດຽວ ທີ່ໄດ້ໃຫ້ບໍລິການຢູ່ທາງຈຳປາສັກຢູ່ແລ້ວ ໄດ້ເຫັນດີເຖີງແນວທາງ ແລະ ນະໂຍບາຍທີ່ກົງກັນຈື່ງໄດ້ລົງມັດຕິຮ່ວມເຊັນສັນຍາໃນຄັ້ງນີ້.

ສຳລັບ ທາງບໍລິສັດ ໂຊກມີໄຊ ຈຳກັດຜູ້ດຽວ, ທ່ານ ຢູຣະນັນ ລາດຊະວົງ ຮອງອຳນວຍການ ບໍລິສັດ ໂຊກມີໄຊ ໄດ້ກ່າວເຖີງແຮງບັນດານໃຈໃນການຮ່ວມມືກັບ ບໍລິສັດ ໂລກ້າ ຈຳກັດ ວ່າ: ການຮ່ວມເຊັນສັນຍາໃນຄັ້ງນີ້ ຖືວ່າເປັນປາກົດການດີທີ່ໄດ້ເກີດຂື້ນຢູ່ໃນນະຄອນປາກເຊຂອງເຮົາ ແລະ ເປັນໂອກາດດີທີ່ ບໍລິສັດ ໂລກ້າ ຈຳກັດ. ໄດ້ນຳລະບົບການໃຊ້ງານການເອີ້ນລົດແບບອອນລາຍ ເຊີ່ງເປັນທາງເລືອກໃໝ່ໃຫ້ລູກຄ້າ ທີ່ຈະເພີ່ມຄວາມສະດວກສະບາຍ ແລະ ລາຄາທີ່ໂປ່ງໃສ, ເຮົາໄດ້ຄາດຫວັງວ່າ ບໍລິສັດ ໂຊກມີໄຊ ແລະ ບໍລິສັດ ໂລກ້າ ຈະດຳເນີນຮ່ວມພັດທະນາຕໍ່ໄປດ້ວຍກັນ.

ທ່ານສຸລິຍາ ນາເຟືອງວິໄລ ຮອງຫົວໜ້າພະແນກແຜນການ ແລະ ການລົງທຶນແຂວງຈໍາປາສັກ ໄດ້ໃຫ້ຄຳຄິດເຫັນວ່າ: ຂ້າພະເຈົ້າເຊື່ອໝັ້ນວ່າທັງສອງບໍລິສັດໄດ້ມີການຮ່ວມມື ແລະ ຮ່ວມກັນພັດທະນາການບໍລິການຂົນສົ່ງໂດຍສານ ນັບວ່າເປັນຈຸດເລີ່ມຕົ້ນຄວາມໝາຍໃໝ່ໃນການພັດທະນາການຄົມມະນາຄົມຂົນສົ່ງຂອງ ສປປ ລາວ.

ທ່ານ ລັດສະໄໝ ຮຸ່ງໄຊຍະສິງ ຮອງປະທານ ສູນບໍລິການວິສະຫະກິດຂະໜາດນ້ອຍ ແລະ ຂະໜາດກາງແຂວງຈຳປາສັກ ໄດ້ກ່າວວ່າ: ຮູ້ສືກຍິນດີທີ່ທຸລະກິດຂອງບໍລິສັດທັງສອງໄດ້ຕົກລົງຮ່ວມເຊັນສັນຍາຮ່ວມມືກັນລະຫວ່າງ ບໍລິສັດ ໂຊກມີໄຊ ແລະ ບໍລີສັດ ເພື່ອຈະເຮັດໃຫ້ການໃຫ້ບໍລິການເພື່ອປະຊາຊົນພາຍໃນແຂວງຈຳປາສັກ, ນັກທ່ອງທ່ຽວທັງພາຍນອກ ແລະ ພາຍໃນທີ່ຈະເຂົ້າມາໃນອານາຄົດ ເຮັດໃຫ້ການບໍລິການແທັກຊີນັ້ນດີຂື້ນກວ່າເກົ່າ ແລະ ມັນໄດ້ເປັນບາດກ້າວທີ່ສຳຄັນທີ່ສຸດ ເພື່ອໃຫ້ການພັດທະນາດ້ານການບໍລິການໃຫ້ມັນເກີດໜໍໍ່ອອກຜົນຂື້ນໄປ.

ທ່ານ ສິໂຫ ຈັນທະຄູນ ຮອງຫົວໜ້າຂະແໜງການຄຸ້ມຄອງຂົນສົ່ງ ພະແນກໂຍທາທິການ ແລະ ການຂົນສົ່ງ ແຂວງຈໍາປາສັກ ໄດ້ກ່າວວ່າ: ຮູ້ສືກດີໃຈທີ່ທັງສອງບໍລິສັດໄດ້ໃຫ້ຄວາມສົນໃຈການບໍລິການທີ່ຈະເຮັດໃຫ້ປະຊາຊົນໄດ້ມີຫຼາຍທາງເລືອກ ແລະ ສາມາດຮູ້ລາຄາທີ່ໂປ່ງໃສໄດ້.
ຫຼັງຈາກໄດ້ຮັບຄວາມຊີ້ແນະ ແລະ ຄໍາແນະນໍາຂອງແຂກຜູ້ມີກຽດທຸກທ່ານແລ້ວ ທ່ານ ສຸລິໂຍ ວົງດາລາ ອໍານວຍການບໍລິສັດ ໂລກ້າ ຈໍາກັດ ແລະ ທ່ານນາງ ພິ່ງກີ້ ທອນທົງເດດ ອໍານວຍການບໍລີສັດ ໂຊກມີໄຊ ຈໍາກັດ ຜູ້ດຽວ ໄດ້ພ້ອມກັນລົງນາມເຊັນສັນຍາການຮ່ວມມືຄັ້ງດັ່ງກ່າວ. ພິທີເຊັນສັນຍາຄັ້ງນີ້ ມີຄວາມສໍາຄັນເປັນຢ່າງຍິ່ງໃນການພັດທະນາວຽກງານບໍລິການດ້ານແທັກຊີໃນແຂວງຈໍາປາສັກ.

ນອກຈາກການເປີດໃຫ້ບໍລິການ ໃນສາຂາປາກເຊແລ້ວ, ໂລກ້າ ຍັງໄດ້ເນັ້ນເລື່ອງຂອງຄວາມປອດໄພໃຫ້ແກ່ຜູ້ໂດຍສານທຸກຄົນທີ່ໃຊ້ບໍລິການ ການໂດຍສານທຸກຖ້ຽວຂອງໂລກ້າແມ່ນໄດ້ຮັບການຄຸ້ມຄອງສູງສຸດ 500,000,000 ກີບ ຈາກ ພົງສະຫວັນປະກັນໄພ (APA)
ແລະ ໂລກ້າ ຍັງມີສິດທິພິເສດ ໂດຍການໃຫ້ລູກຄ້າສາມາດສະສົມຄະແນນຈາກການໃຊ້ບໍລິການຂອງໂລກ້າເພື່ອແລກຂອງຂັວນ ແລະ ບໍລິການຕ່າງໆອີກດ້ວຍ.

ພ້ອມນີ້ ບໍລິການຂອງໂລກ້າກໍຍັງມີລາຄາທີ່ໂປ່ງໃສ ເພາະນຳໃຊ້ລະບົບຄິດໄລ່ລາຄາທີ່ຜູ້ໃຊ້ສາມາດກວດສອບໄດ້ໃນທຸກໆຖ້ຽວ, ມີປະຫວັດຂອງຄົນຂັບ ແລະ ຍິ່ງເດີນທາງພ້ອມກັນຫຼາຍຄົນຍິ່ງປະຢັດ ເພາະຄ່າບໍລິການແມ່ນສາມາດຫານກັນໄດ້ (ບໍ່ໄດ້ໄລ່ເປັນບຸກຄົນ).

ຕິດຕໍ່ສອບຖາມຂໍ້ມູນເພີ່ມເຕີມ:

– ໂທລະສັບ: 02098111129

– Facebook: www.facebook.com/localaos

– Website: www.loca.la

Related Posts

LOCA ເລິ່ມໃຫ້ບໍລິການແລ້ວ!

ເນື່ອງຈາກສະຖານະການໂຄວິດ-19 ຢູ່ນະຄອນຫຼວງວຽງຈັນມີການຄວບຄຸມຢ່າງເຂັ້ມງວດເປັນໄລຍະເວລາ 1 ເດືອນເຕັມ, ເຮັດໃຫ້ໃນປັດຈຸບັນມີຫຼາຍເຂດ ແລະ ຫຼາຍບ້ານເປັນເຂດສີຂຽວສາມາດເດີນທາງໄດ້, ທາງໂລກ້າກໍເຫັນວ່າການເດີນທາງດ້ວຍລົດແທັກຊີຍັງມີຄວາມຕ້ອງການ ແລະ ຈຳເປັນຢູ່ສຳລັບປະຊາຊົນບາງກຸ່ມ, ເພື່ອແກ້ໄຂບັນຫານີ້ ທາງໂລກ້າຈຶ່ງໄດ້ມີມາດຕະການປ້ອງກັນໂຄວິດ-19 ໃນການໃຫ້ບໍລິການ...

LOCA CORPORATE: ໂລກ້າສໍາລັບອົງກອນ ໃຊ້ກ່ອນຈ່າຍຕາມຫຼັງ

ທ່ານເຄີຍພົບບັນຫາແບບນີ້ບໍ່: ຕ້ອງໄປວຽກນອກດ່ວນ ແຕ່ລົດຢູ່ບໍລິສັດລົດບໍ່ພໍໃຊ້ ຕ້ອງໄດ້ລໍຖ້າດົນວ່າງກ່ອນ. ຈະເອີ້ນລົດມາຮັບ ກໍຕ້ອງໄດ້ຊໍາລະກ່ອນແລ້ວເບີກນໍາຫຼັງ. ບັນຫາເຫຼົ່ານີ້ ຈະໝົດໄປຖ້າທ່ານເລືອກບໍລິການ LOCA CORPORATE ໂລກ້າສໍາລັບອົງກອນ   LOCA...