ໂລກ້າເລີ່ມຫັນປ່ຽນບໍລິການແທັກຊີຂອງຕົນໃຫ້ເປັນລົດໄຟຟ້າທັງໝົດ 100% ພາຍໃນປີ 2030 ພ້ອມຕິດຕັ້ງຕູ້ສາກລົດໄຟຟ້າເພື່ອຮອງຮັບ ໃຫ້ຄອບຄຸມທົ່ວປະເທດ

Share:

ກະແສການນຳໃຊ້ລົດໄຟຟ້າໃນປະເທດລາວແມ່ນນັບມື້ນັບສູງຂຶ້ນເນື່ອງມາຈາກປັດໄຈຫຼາຍໆຢ່າງທີ່ເກີດຂຶ້ນ ເຊິ່ງບໍລິສັດໂລກ້າພວກເຮົາກໍເຫັນເຖິງທ່າແຮງໂຕນີ້ເຊັ່ນກັນ ຈຶ່ງໄດ້ເລີ່ມທີ່ຈະມີນະໂຍບາຍໃນການເລີ່ມຫັນປ່ຽນບໍລິການແທັກຊີຂອງຕົນ ຈາກທີ່ແຕ່ເດີມນັ້ນ ລ້ວນແຕ່ເປັນລົດທີ່ໃຊ້ພະລັງງານນ້ຳມັນ ໃຫ້ກາຍມາເປັນລົດໄຟຟ້າທີ່ໃຫ້ບໍລິການແທັກຊີໂລກ້າທຸກໆຄັນ ໂດຍຕັ້ງເປົ້າໝາຍທີ່ຈະບັນລຸຄວາມສຳເລັດນີ້ໃຫ້ໄດ້ພາຍໃນປີ 2030.

ລົດໄຟຟ້າກຳລັງສາກລົດດ້ວຍຕູ້ສາກຂອງໂລກ້າ

 

ການນຳໃຊ້ລົດໄຟຟ້ານັ້ນ, ນອກຈາກຈະຊ່ວຍປະຢັດຕົ້ນທຶນໃຫ້ແກ່ຄົນຂັບໂລກ້າ ເພາະລາຄາສາກໄຟລົດທີ່ຖືກກວ່າຄ່າເຕີມນ້ຳມັນແລ້ວ ການນຳໃຊ້ລົດໄຟຟ້າຍັງສາມາດຫຼຸດຜ່ອນການເຜົາໄໝ້ນ້ຳມັນ ແລະ ຫຼຸດຜ່ອນການປ່ອຍ CO2 ທີ່ອອກມາຈາກຕົວລົດໄດ້ອີກດ້ວຍ. ໂດຍໃນປັດຈຸບັນ, ໂລກ້າແມ່ນມີລົດໄຟຟ້າໃຫ້ບໍລິການແທັກຊີແລ້ວ 5 ຄັນ ຈາກແທັກຊີທັງໝົດຂອງໂລກ້າ 600 ຄັນ, ຮັບ-ສົ່ງຜູ້ໂດຍສານແລ້ວເປັນໄລຍະທາງທັງໝົດຫຼາຍກວ່າ 18,912 ກິໂລແມັດ ແລະ ສາມາດຫຼຸດຜ່ອນການປ່ອຍ CO2 ໄດ້ເຖິງ 4,352 ກິໂລກຣາມ.

ພວກເຮົາໄດ້ເລີ່ມທີ່ຈະຊຸກຍູ້ຄົນຂັບແທັກຊີຂອງຕົນໃຫ້ຫັນມາໃຊ້ເປັນລົດໄຟຟ້າໃນການບໍລິການ ໂດຍໃຫ້ທັງຄຳແນະນຳ, ການໃຫ້ຄວາມຮູ້ເລື່ອງລົດໄຟຟ້າຕ່າງໆ ລວມທັງໃຜທີ່ມີລົດໄຟຟ້າຢູ່ແລ້ວກໍສາມາດມາເຂົ້າຮ່ວມເປັນແທັກຊີ ເພື່ອສ້າງລາຍໄດ້ໃຫ້ກັບຕົວເອງ ແລະ ທັງຍັງສ້າງການຂັບຂີ່ເດີນທາງທີ່ເປັນມິດຕໍ່ສິ່ງແວດລ້ອມອີກດ້ວຍ ໂດຍປີ 2022 ນີ້ແມ່ນພວກເຮົາຕັ້ງເປົ້າທີ່ຈະມີບໍລິການແທັກຊີດ້ວຍລົດໄຟຟ້າທັງໝົດ 30 ຄັນ ແລະ ຄ່ອຍໆຫັນປ່ຽນໃຫ້ເປັນລົດໄຟຟ້າທັງໝົດໃນປີ 2030.

ສຸລິໂຍ ວົງດາລາ, CEO ຂອງໂລກ້າ ກຳລັງເວົ້າເຖິງເປົ້າໝາຍການພັດທະນາທີ່ຍືນຍົງຂອງໂລກ້າ

 

ເພື່ອຮອງຮັບການຫັນປ່ຽນເປັນບໍລິການແທັກຊີດ້ວຍໄຟຟ້າທັງໝົດ 100% ນີ້ເອງ, ພວກເຮົາກໍຈະເລີ່ມຕິດຕັ້ງສະຖານີສາກລົດໄຟຟ້າແບບໄວທີ່ນະຄອນຫຼວງວຽງຈັນເປັນບ່ອນທຳອິດ ເພື່ອຮອງຮັບການໃຊ້ລົດໄຟຟ້າຂອງຄົນທົ່ວໄປ ລວມທັງຄົນຂັບຂອງເຮົາໃຫ້ທົ່ວເຖິງ ແລ້ວຄ່ອຍໆຂະຫຍາຍໄປແຕ່ລະແຂວງ ໂດຍຈະຕິດຕັ້ງຕາມເສັ້ນທາງເລກທີ 13 ເປັນຫຼັກ ເຊິ່ງກໍເປັນເສັ້ນທາງທີ່ຄົນສ່ວນໃຫຍ່ໃຊ້ເດີນທາງໃນເວລາອອກຕ່າງແຂວງຢູ່ແລ້ວນັ້ນເອງ. ໂດຍຕູ້ສາກລົດໄຟຟ້າຂອງໂລກ້າຈະເປັນຕູ້ເປັນແບບ DC ເຊິ່ງສາມາດສາກລົດໄຟຟ້າເຕັມພາຍໃນ 20-40 ນາທີບໍ່ວ່າຈະເປັນ BMW, BYD, Hyundai, Tesla, Volkswagen ແລະ ອື່ນໆອີກຫຼາຍຍີ່ຫໍ້.

ສຸລິໂຍ ວົງດາລາ, CEO ຂອງໂລກ້າ ກຳລັງໃຫ້ສຳພາດສື່ເລື່ອງການຫັນປ່ຽນບໍລິການແທັກຊີໂລກ້າກາຍເປັນລົດໄຟຟ້າທັງໝົດ

 

ໃນປີ 2022 ນີ້ ແມ່ນທາງໂລກ້າໄດ້ຕັ້ງເປົ້າທີ່ຈະຕິດຕັ້ງຕູ້ສາກໃຫ້ໄດ້ 12 ສະຖານີ ໂດຍທຸກສະຖານີຈະມີ 2 ຕູ້ສາກ ສາມາດສາກລົດໄຟຟ້າໄດ້ 4 ຄັນພ້ອມກັນໃນໜຶ່ງສະຖານີ. ຈາກນັ້ນໃນປີ 2023 ແມ່ນໂລກ້າຈະຂະຫຍາຍເພີ່ມໃຫ້ໄດ້ເປັນ 25 ສະຖານີ ແລະ ຕິດຕັ້ງເພີ່ມລວມເປັນທັງໝົດ 40 ສະຖານີທົ່ວປະເທດລາວໃນປີ 2025.

ການນຳໃຊ້ຕູ້ສາກລົດໄຟຟ້າຂອງໂລກ້ານັ້ນ ສາມາດໃຊ້ງານງ່າຍໆຜ່ານແອັບ Loca ເຊິ່ງໃນແອັບແມ່ນຈະປະກອບມີທັງການຊຳລະຄ່າສາກຜ່ານແອັບ, ເບິ່ງເປີເຊັນການສາກລົດ, ເບິ່ງສະຖານີສາກບ່ອນໆຕ່າງໆໄດ້ອີກດ້ວຍ.

ດາວໂຫຼດແອັບໂລກ້າໄດ້ທີ່ແລ້ວທີ່: https://loca.la/download

Related Posts

ໂລກ້າ x ຟູດແພນດ້າ: ສະສົມຄະແນນໂລກ້າເມມເບີ ແລກສ່ວນຫຼຸດຟູດແພນດ້າ!

ທ່ານຮູ້ແລ້ວບໍ່ວ່າ ບໍລິການໂລກ້າໃນແຕ່ລະຖ້ຽວ ແມ່ນຈະໄດ້ຮັບຄະແນນໄວ້ສະສົມ ເພື່ອແລກເປັນສ່ວນຫຼຸດຈາກ ແອັບຟູດແພນດ້າໄດ້ແລ້ວ! ສໍາລັບລາຍລະອຽດໃນແລກສ່ວນຫຼຸດ: ເງື່ອນໄຂດ່ັງກ່າວແມ່ນສະເພາະຜູ້ທີ່ລົງທະບຽນ Loca Members ເທົ່ານັ້ນ. ທ່ານສາມາດແລກໄດ້ 1 ສິດຕໍ່ເດືອນ....